លោក Jurgen Klopp អ្នកចាត់ការហង្សក្រហម Liverpool បានបង្ហាញអារម្មណ៍ភ្ញាក់ផ្អើលត្រង់ថា មកទល់ពេលនេះ ហើយ មិនមានក្លឹបណាមួយដាក់សំណើចង់បានខ្សែប្រយុទ្ធ Divock Origi នោះទេ នៅរដូវក្តៅនេះ ទោះបីជាកីឡាកររូបនេះ មិនស្ថិតក្នុងជម្រើសរបស់លោក ក្នុងរយៈពេលកន្លងមកនេះ។ Origi ទទួលបានឱកាសចូលលេងក្នុងជម្រើសដំបូង ក្នុងជំនួប Liverpool ឈ្នះ AC Milan ៣-២ ក្របខណ្ឌ Champion League និងបានបញ្ជូនបាល់ឲ្យ Salah ស៊ុតបញ្ចូលទីបានមួយគ្រាប់ផងដែរ កាលពីយប់ថ្ងៃពុធកន្លងទៅ។ នេះជាការបង្ហាញខ្លួនលើកដំបូង ក្រោយមិនមានឱកាសបង្ហាញខ្លួនជម្រើសដំបូងសោះតាំងពីខែមករាមក។ ​ទោះជាយ៉ាងណា ខ្សែប្រយុទ្ធសញ្ជាតិប៊ែលហ្ស៊ិករូបនេះ នឹងបន្តស្នាក់នៅជាមួយ Liverpool បន្ត ក្រោយពុំមានសំណើណាមួយចង់បានរូបគេ។ លោក Klopp បាននិយាយក្រោយការប្រកួតយប់ថ្ងៃពុធថា គាត់ពិតជាភ្ញាក់ផ្អើលមែនទែន ហេតុអ្វីក្លឹបផ្សេងៗមិនចាប់អារម្មណ៍ខ្សែប្រយុទ្ធដែលមានគុណភាពរូបនេះ ព្រមទាំងអះអាងថា Origi នឹងត្រូវបានចាត់ទុកជាវីរបុរសរបស់ក្លឹប នៅពេលដែលគាត់ចាកចេញពីក្លឹបផងដែរ ។​រំឮកពីពេលវេលាដ៏គួរឲ្យចងចាំបំផុតរបស់ Origi គឺរូបគេបានស៊ុតបញ្ចូលទីទៅលើក្រុម Tottenham Hotspur នៅវគ្គផ្តាច់ព្រ័ត្រ UCL នៅឆ្នាំ ២០១៩ ដែលរូបគេបានជួយឲ្យក្រុមហង្សក្រហម Liverpool ឈ្នះពាន UCLនៅរដូវកាលនោះផងដែរ  ៕ ប្រភព៖ Dailymail