អ្នកចាំទី Gianluigi Donnarumma ត្រូវបានរាយការណ៍ថា មិនសប្បាយចិត្តចំពោះតួនាទីជាអ្នកចាំទីដៃទី ២នៅ Paris Saint Germain ឡើយ ។ 

កីឡាករដែលបានរួមចំណែកជួយអ៊ីតាលីលើកពាន UEFA Euro 2020 ទើបចូលលេងបាន ២ប្រកួតប៉ុណ្ណោះសម្រាប់ក្រុមថ្មី PSG ពេលប៉ះ Clermont Foot និង Lyon ។

បើតាមសារព័ត៌មាន ​della Sera ភ្នាក់ងាររបស់ Donnarumma គឺលោក Mino Raiola បានពិចារណាលើអនាគតអតីតកីឡាករ AC Milan រូបនេះរួចទៅហើយ ដោយមានការភ្ជាប់ទៅនឹងការផ្លាស់ទៅ Juventus នៅរដូវកាលក្រោយ ។

លោក Mauricio Pochettino គ្រូបង្គោលរបស់ក្រុម Paris Saint Germain ទទូចថា ការជ្រើសរើសកីឡាករណាមួយ គឺអាស្រ័យលើ​ចរិតលក្ខណៈរបស់បុគ្គលម្នាក់ៗ ហើយ​ទាំង Keylor Navas និង Donnarumma សុទ្ធតែធ្វើបានល្អដូចគ្នាពេលហ្វឹកហាត់ប្រចាំថ្ងៃដែលធ្វើឲ្យមានការពិបាកក្នុងការសម្រេចចិត្តជ្រើសរើសអ្នកណាជាអ្នកចាំទីដៃទី ១ របស់ក្លឹប ។ លោកពិតជារីករាយនៅពេលដឹងថា កូនក្រុមរបស់លោកយកចិត្តទុកដាក់ និងចង់ជាប់ជម្រើសដំបូងដូចៗគ្នាបែបនេះ៕

ប្រភព : Sport talk